كنت فرحان بالحركة اللي حصلت في البلد يوم 7، مظاهرة هايلة، مراقبة على الانتخابات رغم كل الموانع... لكن فيه خبر كئبني و نساني الكلام ده كله. و اكتئبت أكتر لإن الخبر كان معروف من يومين و ضاع مني أنا على الأقل في هوجة الانتخابات و اليوم الفاصل إلخ إلخ...
النهاردة عم نجم كاتب في عاموده في جرنال المصري اليوم كاتب بيرثي نزار سمك. راح مع اللي راحو في الحريقة المؤسفة في بني سويف. نزار سمك؟! مش معقولة! انا كنت قرأت عن الحادثة سريعا واقلب و ارجع لمبارك و التجاوزات و المراقبين و مجلس الدولة... نزار سمك؟! أنا كنت أعرف الراجل ده! مبقيتش عارف راسي من رجليا. كل اللي شفته و عملته في اليومين اللي فاتوا انسحبت عنه الأضواء المسرحية في ثواني، بعد ما كان بيتفشخر في عين خيالي قدام الجماهير. طز في الانتخابات! طز لما يكون الراجل ده راح في حادثة! و الموضوع حصل وانا ولا هنا، علشان دايما بدور على الطرقعة
و الحدث الكبير
نزار سمك زي ما عرفته – و معرفتي بيه كانت ضئيلة لكن احترمته في دقايق – معتقدش إنه كان هيجري ورا المعمعة على حساب حدث زي ده يمكن يكون أصغر، لكن له ثقل برضه. مش هانسى حواري معاه عن شغله كمسرحي مع وزارة الثقافة، و عن رحلاته في مصر كلها سعيا لإحياء المسرح في ريف مصر و عموما المناطق خارج العاصمة. مع العلم إنه كان نضالي قديم. لذلك استغربت من الراجل ده بتاع انتفاضة السبعينات الطلابية اللي بيشتغل مع الحكومة و بيشحطط نفسه في البادية. يمكن مافهمتوش غير النهاردة، لما اقتنعت إن فيه زلازل بتحصل قدام كاميرات العالم و على مسارح السياسة الفخمة، في حين إن فيه حاجات أهم بكتير ممكن تكون بتحصل على مسرح صغير في بني سويف...
البوليس المصري هايل. عزموا عليا بسجاير و شربوني كولا النهارده. و غالبا حطوا فيها كيماويات "انتخب مبارك". بس مش هانتخب أصلا عشان ماليش بطاقة انتخابية (فوت علينا في شهر نوفمبر). عموما اطمئنينا و الحمد لله إن مفيش غرامة على عدم الانتخاب و هانشوووووووف لو هيبقى فيه غرامة على انتخاب أي حد غير دين أمه! بس يا ولاد الوسخة أنا جاي البلد مخصوص عشان انتخب... أوكيه فاهم موقف القضاة عشان متبقاش سبهللة! بس قولولي طيب جابوا 32 مليون ناخب منين! على العموم كده خلصنا من السؤال العويص ننتخب مين من الهايفين ولا نبطل الصوت و لا منروحش... المهم النهارده و في أحد الأقسام بحثا عن بطاقة انتخابية لله كانت محاولة التسجيل بميكروفون خفي لما يدور في طوابير الراغبين في التغيير أو متفاديو الغرامة - لذاكرة التاريخ أو لتصعيد الجلاجل، و كانت المكافأة كزوزة وسجاير ببلاش في مكتب المأمور؛ إللي مارضيش يقوللي إسمه ده يا جدعان هو خايف مني ولا إيه إيه what what
المهم ابتسامات و صحبة حلوة و كلام عن الحرية
الجديدة في البلد و "إنت لو كنت استأذنت كنت سجلت براحتك خالص!" إيه يا عم ده دي الحكومة مش بس بايظة دي بقت خرعة كمان :) و يا ريت نعرف نخرعها أكتر عشان الناس بدل ما تقعد تقول أصل مبارك ده شبعان خلاص ما يتخافش منه تقول
bye byeشنب النجعاوي راح خلاص
رجاله مخستعة شوفولنا غيرهم
و يا ريت أصلا نخلص من خلط السياسة بأحلام الهبر على موائد رمضان و هلوسات الفحولة الجنسية. و إليكم إذ1 في النهاية برنامجي الانتخابي لعام 2030 "فياجرا لكل مواطن" عشان محدش يستقل بحد و الرجالة تنيك 24 ساعة و بعدبن تروح في النوم و الستات تحكم البلد و شكرا. المهم هانشوف بكره هنعرف نسجل براحتنا ولا لأ
