cccc
تحدث طبيبي النفسي عن ذلك الإنسان الذي يعود من المجاعة ناسيا كيف يأكل.
على الموائد المعدة للمصالحة يقيء لاإراديا. أعتقد أنني أقيء أيضا بأشكال مختلفة
Subversiveness is neither cool nor adolescent
الجمعة، يونيو ٠٢، ٢٠٠٦
حصاد إسبوع زفت... و ردود أفعال ألمانيةصحيت النهاردة – والنهاردة يوم شغل في ألمانيا – ودني الشمال مسدودة. إفتكرت إني نسيت جرعتي اليومية (3 مرات). عندي إدمان لسماع الهتافات من مصر. بتجيلي سلعة مستوردة عن طريق تسجيلات القنوات وتسجيلات أصدقاء. بلزق ودني في السماعة وببقى كويس (نوعا ما). عندي شوق لسماع الأصوات على الأقل، أصوات الناس إللي أنا قلقان عليهم. لقيت عندي تسجيلات قديمة لعلاء (جرعة الصباح. زميلتي سمر في مصر بعتيتلي كلام سجلته مع شرقاوي يوم 25كلمت الدكتورة منى مينا علشان أطمئن عليه. كلمت مالك علشان أسمع صوته (أخيرا) ويحكيلي. نفسي أتكلم مع بهاء
عندي رغبة لما أي حد يشتيكيلي من أي مشكلة أيا كانت إني أقوله: بص شوف الشباب في مصر عملوا إيه (وأعمل زيهم)! مش قادر أعبر قد إيه أنا سعيد وشاكر إني إتعرفت السنة إللي فاتت على بعض الناس من إللي هما معتقلين دلوقتي، وسهرت معاهم، وسمعت كلامهم. أو حتى شفتهم من بعيد. بأحس إن كل حاجة بيعملوها بتتكلم عن الصبر والتواضع و الإصرار وقبل أي حاجة: التفائل
مش عارف حياتي كانت هتبقى عاملة إزاي لو ما كنتش قابلتهم. والله أعلم هما جواهم حاسين بإيه دلوقتي
وزيهم منال وسلمى وناس كتيرتانية ساندت المعتقلين
حكيت الكلام ده مع فنجان قهوة للست صاحبة المطعم الصغير إللي محلها إتحبس جوا الكردون الأمني قدام الجامعة في مدينة بون. وأنا داخللها العسكري قاللي رايح فين. قولتله صحافة وكشرت في وشه وقولتله متضحكش كدهقاللي طب إتفضل. يخرب بيتك دانت لاتيف خالص
لإن الإدمان يحتم زيادة الجرعة باستمرار. رافقت طلبة ألمان الأمن بيضربهم قدام الجامعة. عملوا مظاهرات لإن الجامعة عاوزة ترفع تكاليف الدراسة. بيهتفوا بالفرنساوي إستشهادا بإللي حصل في فرنسا في الشهور الأخيرة. قرروا يقتحموا المبني إللي مجلس الجامعة كان هينعقد فيه عشان يقر زيادة الرسوم. ويعملولهم إعتصام عشان المجلس ميعرفش ينعقد. الأمن حواطلهم مداخل الجامعة. قالوا الطلبة هانمنع نواب المجلس من الدخول. الأمن ساعد بعض النواب على الدخول بالقوة وضرب الطلبة إللي عملوا حيطة قدامهم. مش ضرب مبرح يعني. إتكلمت مع واحد من الطلبة (إسمه "تيل") قاللي إن الطلبة قرروا التصعيد عشان بيشتكوا ويتظاهروا من سنة ومحدش مهتم. وقاللي إن الغريبة إنه من ساعة ما الأمن بقى يضرب ويعور ناس، من ساعتها حماسهم زاد، والمشاركين زادوا. قولتلوا دي غريبة فعلا عشان فيه واحد إسمه شرقاوي قاللي نفس الكلام ده قبل كده
المجلس ماعرفش ينعقد فنقلوا الجلسة إلى مكان سري بعض إصدار تعليمات لكل نائب إنه يقف على ناصية معينة في منطقة الجامعة (وزميله على ناصية غيرها وهكذا) لحد ما تيجي عربية تاخد كل واحد للمكان إللي النواب نفسهم ماكانوش يعرفوه. نفس السيناريو الجاسوسي حصل من كذا إسبوع في مدينة كولونيا، لكن قبلها كانوا الطلبة قدروا يعتصموا في الجامعة 11 يوم ويأجلوا إنعقاد المجلس. في النهاية أقروا زيادة الرسوم في المدينتين (وغيرهم للأسف). قولت ل"تيل" إني مستغرب ليه إللي بيحصل في ألمانيا، وإللي بيحصل في مصر وفرنسا والمغرب وإلخ ماطفحش على بعضه لحد دلوقتي عشان الصوت يبقى مسموع بجد. قاللي "قريب". إفتكرت مقال نورا و ضفت على "قريب" كلمتين كمان: ولسه ياما ياما
الألمان ساعات بيقولوا كلام كويس. عاوز أستشهد بيوشكا فيشر: لا مؤاخذة يا ريس - سيادتك إبن وسخة
(هاحاول أضيف التسجيلات بعد كده لو لاقيت حد يفهمني إزاي)
Archives
أغسطس 2005
سبتمبر 2005
يونيو 2006
أغسطس 2008
أكتوبر 2009
فبراير 2011
أبريل 2011
يوليو 2011
